Preparan na India o que sería o primeiro smartphone Braille

Aínda que os smartphones teñan funcións de accesibilidade, a chegada das pantallas táctiles non foi moi ben recibida para as persoais con dificultades visuais, e pero que incluso os invidentes poidan empregar un dispositivo deste tipo están a preparar na India un smartphone moi especial, que facilita a transformación de mensaxes de texto e correos electrónicos en patróns Braille. Este revolucionario produto será froito do traballo do emprendedor Sumit Dagar, en colaboración con IIT Delhi, que xa está en fase de prototipo. Dagar asegura que “a resposta durante as probas está a ser inmensa. Para o usuario estase a converter máis nun compañeiro que nun teléfono” á vez que adianta que no futuro buscarán desenvolver versións máis avanzadas que a actual.
Dagar principiou este proxecto baseado nunha pantalla táctil capaz de elevar a afundir contidos sobre a mesma facéndoa tocable hai 3 anos, conseguindo financiamento dos Rolex Awards, que galardoan a 5 persoas de todo o mundo cada 2 anos para achegar fondos aos seus proxectos.

O smartphone para invidentes estaría baseado nunha aliaxe con memoria de forma, tecnoloxía baseada no concepto de metais que lembran a súa forma orixinal (expandíndose ou contraéndose á súa forma orixinal tras o seu uso). Aínda non ten data de lanzamento, e a súa reducida demanda tampouco acelerará especialmente o deu desenvolvemento, pero cómpre destacar que sería moito máis que un móbil, pois entre as súas funcións podería estar a de traducir fotografías, mapas, números e texto captados pola súa cámara a Braille, polo que sería unha ferramenta cun inmenso potencial, tal e como explicou o propio Sumit Dagar nunha chala TED que impartiu hai un par de anos: