Estiman que este ano os tablets superarán en vendas aos ordenadores portátiles

Aínda que dende BlackBerry pensen que os tablets van pasar á irrelevancia en poucos anos, os estudos de mercado apuntan na dirección contraria, e unha proxección realizada por International Data Corporation (IDC) amosa que este ano este tipo de dispositivos medrarían un 60%, de xeito que este mesmo ano superarían en vendas aos ordenadores portátiles, para facer o mesmo co total dos ordenadores persoais en 2015, marcando un significativo cambio na aptitude dos consumidores cara aos dispositivos informáticos e aplicacións que empregan no seu día a día.
Aínda que dende IDC confían en que o PC continúe a xogar un rol importante no sector, especialmente na empresa, entenden que os tablets están a atender dun xeito sinxelo e elegante os usos básicos que antes facían dos ordenadores. Tamén apuntan a que os tablets de pequeno tamaño está a medrar de xeito significativo dende 2011, e van camiño de superar ao mercado de tablets de grande tamaño: en 2011 os tablets de menos de 8 polgadas ocupaban o 27% do mercado, e durante o presente ano poderían chegar ao 55%.