Detectan un fallo de seguridade que permite mudar os nomes dos nosos contactos no WhatsApp para Android

Nos últimos días está a dar bastante que falar un fallo da aplicación de WhatsApp para Android que algúns definen como virus (pese a non ser tal) e que consiste nun ficheiro con información de contacto chamado Priyanka que, de recibirse a través desta plataforma e engadilo á axenda, provoca que todos os contactos dentro da aplicación muden o seu nome polo de Priyanka, o que dificulta enormemente o uso da ferramenta de mensaxería instantánea.
De todos os xeitos estamos ante un problema bastante doado de solucionar, pois para non verse afectado chega con non gardar información de contacto non solicitada a través de WhatsApp e para restaurar os contactos en caso de padecer os efectos de Priyanka chega con eliminar o contacto engadido, ir á sección de configuración de aplicacións do móbil, parar a aplicación de WhatsApp, premer no botón de limpar datos e volver a WhatsApp para que a listaxe de contactos se rexenere automaticamente.