As redes sociais resultan pouco eficientes no mundo da moda

En España, grazas ao desembarco do grupo Inditex no comercio electrónico, puidemos ver a forza que o mundo da moda ten nas nosas vidas, o que evidencia o feito de que na nosa listaxe coas 100 webs galegas máis populares figuren 4 do grupo de Arteixo entre as 10 primeiras (o que no último mes foi especialmente rechamante ao superar Bershka a La Voz de Galicia), pero este fenómeno non parece progresar do mesmo xeito en todos os ámbitos da Internet, e facendo balance dos últimos anos na Rede están a deducir que a predición de hai un par de anos de que Facebook a outras redes sociais serían os seus principais escaparates está lonxe de ser unha realidade.
Podemos lembrar como houbo un momento no que as tendas chegaron a abrir tendas de seu dentro de Facebook, aproveitando o atractivo desta plataforma, no que algúns xa chamaban F-commerce, pero as iniciativas emprendidas neste ámbito por marcas como Oscar de la Renta, Tory Burch, Gap, J.C. Penny, Nordstrom e moitas outras remataron en fracaso, e practicamente todas botaron o peche.

Ao parecer, non só Facebook está a fracasar na atracción de novas clientes, senón que acontece o mesmo co resto de plataformas sociais, resultando aínda máis efectivas canles como as buscas e o correo electrónico, segundo desvelou a consultora L2, que tras analizar o comportamento de preto de 250 marcas de moda en 15 plataformas sociais. Incluso marcas como Burberry estaría a retirar investimento de Facebook para trasladalo a outras canles para chegar aos seus clientes, o que non quere dicir que as redes sociais deixen de ser unha boa estratexia para conectar as marcas co seu público (e para crear comunidade), senón que, simplemente hai que racionalizar o investimento en plataformas como Facebook ou Twitter de cara a mellorar as vendas e captar novos clientes.