Instagram chega aos 150 millóns de usuarios

A plataforma para dispositivos móbiles que permite tomar e compartir fotografías dun xeito peculiar (adoptando un formato máis semellante ao das cámaras Polaroid en vez de optar polas modernas imaxes panorámicas) así como capturar vídeos de ata 15 segundos, Instagram, anunciou que conseguiu superar os 150 millóns de usuarios activos, de xeito que tería incorporado 50 millóns de novos usuarios nos últimos 6 meses, indicando que o servizo continúa a ter moito pulo, consolidándose como un dos xeitos máis empregados para retratar momentos e lugares dende o móbil de cara a compartilos nas nosas redes sociais.
Podemos lembrar que Facebook mercou Instagram o pasado mes de marzo, e en vista das últimas cifras rexistradas, tal operación non prexudicou en absoluto á plataforma dispoñible oficialmente só para iPhone e Android, aínda que agora teñen que buscar algún xeito de facer rendible todo este tráfico, xa que actualmente o servizo é de balde e sen publicidade. É moi posible que para o ano que vén comecen a vender anuncios dentro de Instagram, aínda que para facer tal están a explorar posibilidades que non estraguen a experiencia de Instagram e espante aos usuarios, polo que a busca da rendibilidade búscana nun longo prazo.