CamScanner facilita o escaneado de documentos dende Windows Phone 8

A calidade das cámaras dos teléfonos móbiles fan que moitos usuarios as estean a empregar a xeito de escáner de documentos, de aí que existan aplicacións como CamScanner para iOS e para Android, e dende hoxe tamén está dispoñible para Windows Phone 8, ofrecendo a posibilidade de escanear facturas, pedidos, contratos, tarxetas de visita, anotacións, libros, artigos… directamente dende o smartphone, para o que permite recortar as imaxes fotografadas, realzar os documentos con varios axustes, converter o resultado en documentos PDF nos que incluso poder aplicar tecnoloxía de recoñecemento óptico de caracteres e xestionar os documentos escaneados, de xeito que incluso podemos sincronizalos para acceder aos mesmos dende distintos dispositivos e copialos a servizos como Skydrive.
CamScanner para Windows Phone 8 tamén permite enviar as imaxes en JPEG por correo e gardar os documentos en formato gráfico na galería fotográfica do móbil. Temos así unha ferramenta moi práctica para o noso día a día, evitando o ter que recorrer a un escáner de sobremesa ou impresora multifunción, o que resulta especialmente cómodo cando estamos fóra da casa ou da oficina.