Vodafone reforza a súa rede 4G

Esta mañá Vodafone anunciou que vai dar un importante pulo á súa infraestrutura de telefonía móbil 4G en España a partir do 1 de abril, data na que ofrecerá cobertura LTE en todas a capitais de provincia e nas cidades de Ceuta e Melilla, de xeito que os servizos 4G estarán dispoñibles en máis de 220 concellos, entre os que figuran as 80 cidades con máis de 70.000 habitantes do Estado. Nas 8 maiores cidades de España a cobertura 4G de Vodafone chega ao 90% da poboación en exteriores, e nas 32 principais cidades supérase o 80%.

Actuacións en Galicia

Vodafone tamén reforzou a cobertura 4G en zonas con alta densidade de tráfico, como aeroportos, estacións de tren e espazos para eventos multitudinarios, que no caso de Galicia serían os aeroportos de Vigo e A Coruña, o Multiusos Fontes do Sar de Santiago de Compostela, os estadios de Riazor (A Coruña), Balaidos (Vigo) e San Lázaro (Santiago de Compostela).

Polo momento o despregamento 4G de Vodafone limítase ás frecuencias de 1.800 e 2.600 MHz, permanecendo á espera da liberación da banda dos 800 MHz, que permitirá acelerar a implantación do 4G e mellorará a cobertura no interior dos edificios. Este tipo de conexións ofrecen polo momento velocidades de transferencia de datos de ata 150 Mbps de descarga e ata 50 Mbps de subida.