Apple permitirá devolver contidos descargables durante 14 días

En virtude da lexislación europea que protexe os dereitos dos consumidores, Apple vén de mudar as condicións de uso de iTunes (aplicables tamén á App Store, á Mac App Store e á iBooks Store), de xeito que a partires de agora a tenda de descargas dixitais acata a directiva europea correspondente e incorpora un período de 14 días para a devolución de compras en liña. Outro dos cambios incorporados supón o cambio na tributación do IVE, que xa non se fará no país no que estea a tenda en liña correspondente, senón no país do comprador, o que suporá que Apple pase de cobrarnos un 3% de IVE a facturarnos o 21%, o que traducirase nunha suba de prezos xeral a partires do 1 de xaneiro.
No relativo á cancelación das compras durante os 14 días posteriores á recepción do recibo correspondente sen indicar motivo algún Apple recoñece tal dereito, pero para efectuar o reembolso do importe pagado hai que pórse en contacto co soporte de iTunes (a través da opción de “sinalar un problema”) ou remitir un formulario de cancelación a Apple, o que non parecen os métodos máis intuitivos para realizar tal procedemento pero, cando menos isto é posible.
Esta opción resultará de grande utilidade para os consumidores, que poden adquirir algún produto descargable deixándose levar por descricións pouco precisas ou que incluso pretenden levar a engano, o que agora terá unha solución máis doada.