Unha fotografía dá a entender que existen granxas de manipulación de rankings da App Store

Dende sempre figurar nas listaxes de vendas afecta á boa marcha dun produto, xa que incrementan o nivel de coñecemento dun produto e engádelle certo valor que insta ao usuario á súa adquisición, o que tamén afecta considerablemente ao mercado de aplicacións móbiles, cada vez máis susceptible aos focos ante a infinidade de aplicacións que hai actualmente dispoñibles, o que fai que xurdan servizos de pagamento que manipulan os rankings para conseguir unha boa posición nas tendas, e que serían moito máis rudimentarios do que poderiamos pensar.
Aínda que podemos pensar que existen sistemas automatizados que simulan ser usuarios que realizan compras artificiais nas distintas tendas de aplicacións móbiles, unha fotografía que está a facerse viral dende China amosaría unha práctica moito máis rudimentaria, e que consistiría nunha persoa fronte a ducias de terminais iPhone 5C que realizarían numerosas compras de apps manualmente e de xeito masivo, contribuíndo a promover aplicacións nas listaxes de vendas, ou sexa, que dá a entender que existen granxas de manipuladores de rankings.
De feito, incluso están a comentarse as supostas tarifas que terían estas empresas, que cobrarían 70.000 iuans (9.885,62 euros) por situar a unha aplicación no Top 10 da App Store, cobrando 405.000 iuans (57.195,40 euros) á semana para que que manteña a posición.
Apple xa conta con medidas para impedir a manipulación a través de sistemas automatizados, polo que haberá que ver se toma medidas contra este novo tipo de prácticas claramente nocivas para a súa tenda de aplicacións, aínda que polo momento non está confirmado que as granxas de manipulación de rankings sexan unha realidade (xa que polo momento todo queda nunha imaxe que está a causar furor na Rede).