Google faise co dominio .app por 25 millóns de dólares

A creación de novos dominios de Internet de primeiro nivel por parte da ICANN vai moito máis aló de nomes de dominio coma o .gal ou o .eus, e moitos destes sufixos teñen un grande interese comercial, de aí que haxa varias entidades que opten por facerse cos mesmos, o que nalgunhas situacións resólvese mediante poxa, o que vén de acontecer co dominio .app, ao que optaban doce entidades, e que finalmente foi parar a Charleston Road Registry Inc., entidade que pagou a meirande cantidade ata o momento por un dominio de primeiro nivel: 25.001.000 dólares.
Outros dominios de primeiro nivel adxudicados recentemente forno .tech por 6,7 millóns de dólares, .buy por preto de 5 millóns de dólares ou .spot por 2,2 millóns de dólares.
Charleston Road Registry Inc. é unha compañía de Google coa que concorre aos dominios de primeiro nivel ante ICANN, posiblemente para evitar a confusión que causaría que se presentase ante a entidade baixo o nome de Google (compañía acreditada como rexistrador de dominios de Internet). O nome desta compañía provén dunha das rúas que rodea a sede de Google.
Polo momento descoñécese a axenda de Google sobre o .app, e só sábese que na súa solicitude aseguraba que “a misión para o dominio de primeiro nivel proposto, .app, é achegar un espazo de dominios dedicados aos desenvolvedores de aplicacións”, asegurando que os usos previstos do novo domino non se limitaría a unha plataforma ou provedor en concreto, ou sexa, que non parece que vaia empregarse como un complemento da tenda de aplicacións de Google Play.