Google investirá 150 millóns de euros durante 3 anos en xornalismo dixital

Nos últimos anos a relación de Google cos medios europeos non foi todo o boa que debera, levando a que nalgúns países se emprenderan medidas de presión por parte dalgunhas cabeceiras de prensa que buscaban que Google as compensase polo valor que engaden os seus contidos á web, promovéndose así leis que ían contra o interese de Google, de aí que a compañía norteamericana decidise enterrar a machada de guerra e presente agora a Digital News Initiative (DNI), unha alianza para ofrecer apoio ao xornalismo de alta calidade en Europa a través da tecnoloxía e a innovación.
Nesta iniciativa participan El País (España), Unidad Editorial (España), Vocento (España), Grupo Godó (España), Grupo 20minutos (España), El Confidencial (España), Les Echos (Francia), FAZ (Alemania), The Financial Times (Reino Unido), The Guardian (Reino Unido), NRC Media (Holanda), La Stampa (Italia) y Die Zeit (Alemania), xunto a organizacións líderes do sector xornalístico, incluíndo European Journalism Centre (EJC), Global Editors Network (GEN) e International News Media Association (INMA); estando previsto que DNI amplíe o seu traballo a outros editores europeos e a calquera persoa involucrada no sector das novas dixitais en Europa.

O obxectivo deste proxecto segundo Google sería ofrecer soporte a un ecosistema de novas sustentable e promover a innovación no xornalismo dixital mediante unha colaboración permanente e de diálogo entre o sector tecnolóxico e o de novas, tirando proveito das oportunidades para a creación e a difusión do bo xornalismo que abre a Internet.
A DNI centrarase en tres áreas chave: desenvolvemento de produtos (abrindo a comunicación entre Google e os editores para desenvolver produtos que beneficien ao ecosistema de novas globalmente), apoio á innovación (cun investimento de 150 millóns de euros para proxectos de xornalismo dixital) e formación e investigación (Google investirá en formación e desenvolvemento para xornalistas e salas de redacción e financiará estudios sobre o contorno dos medios, á vez que ampliará en Europa as Google Journalism Fellowships).
Dá a impresión de que temos así unha canle de axudas á prensa por parte de Google, disfrazada de promoción da innovación, para evitar conflitos con vellos medios establecidos que teñen serios problemas para sosterse no actual contorno mediático.