Participar no programa Windows Insider non supón recibir unha licenza de Windows 10 de balde

Os anuncios de Microsoft sobre a política de licenzas de Windows 10 non deixa de causar confusión, e ao igual que chegou a pensarse que o novo sistema operativo podería piratearse sen limitacións, nos últimos días deuse a entender que os usuarios que participan do programa que abre o acceso á versión preliminar de Windows 10 terían unha licenza de balde do novo sistema operativo, o que non se axusta completamente á realidade.
O que realmente quixeron comunicar dende Microsoft é que os usuarios que están a probar a versión preliminar de Windows 10 poderán actualizar á versión definitiva de Windows 10 tras o 29 de xullo, aínda que de abandonar o programa Windows Insider só poderían seguir a empregar Windows 10 legalmente se actualizaron dende Windows 7 ou Windows 8.1, ou sexa, que os usuarios de Windows XP ou Windows 7 non pode empregar tal atallo para conseguir unha licenza de Windows 10 de balde.
Iso si, os usuarios que se manteñan no programa Windows Insider poderán seguir a gozar do novo sistema operativo, pero iso suporá que continuarán a recibir versións anticipadas de Windows, que chegado certo tempo serían de instalación forzosa, xa que as versións preliminares caducan, o que fai que os equipos no programa estean sempre nunha situación inestable, non recomendable para equipos en explotación.