Parallels Desktop 11 permite usar Cortana baixo OS X

Para poder correr aplicacións de Windows nun Mac existen distintas solucións que van dende o dobre arranque con Boot Camp e a virtualización con diferentes aplicacións entre as que destaca nos últimos anos Parallels Desktop, que é capaz de incluso dotar ás aplicacións do sistema operativo de Microsoft da aparencia de aplicacións nativas de OS X, conseguindo unha grande coherencia que agora vai un paso máis aló ao actualizarse á versión 11, o que supón a compatibilidade completa para OS X El Capitán e Windows 10. Deste xeito non só teremos as melloras propias de renovacións deste tipo de aplicacións (como a promesa dun inicio de aplicacións un 50% máis rápido e de documentos un 20% máis rápido), senón que entre outras cousas facilitaría o uso de Cortana nun Mac, o que resulta moi rechamante.
Parallels Desktop 11 estaría especialmente dirixido a usuarios que queiran usar baixo OS X tanto Windows 8.1 como Windows 10, e unha das novidades que máis agradecerán os usuarios é un modo de viaxe que permite pechar temporalmente os servizos que fan uso intensivo dos recursos para alongar a duración da batería do portátil cando non se ten unha toma de corrente a man.
Esta ferramenta conta tanto cunha versión básica (cunha licenza tradicional que custa 79,99 euros) como cunha edición profesional (que custa 99,99 euros/ano) e que vai dirixida principalmente a desenvolvedores, xa que inclúe complementos para usar Microsoft Visual Studio, engade compatibilidade con ferramentas de desenvolvemento (Docker, Jenkins, Chef…), conta con ferramentas avanzadas de conexión en rede e compatibilidade con servizos empresariais na nube. Os clientes actuais de Parallels terán un desconto do 50% ao actualizaren á nova versión.
As novidades de Parallels Desktop 11 vistas en vídeo