Xeopesca e GPUL convocan a Mapping Party na FIC (16 de outubro)

O vindeiro venres 16 de outubro a Facultade de Informática da Coruña vai acoller a festa Mapping Party na FIC, unha actividade divulgativa, lúdica e participativa destinada a amosar as vantaxes e posibilidades de OpenStreetMap, o servizo libre para a creación e intercambio de mapas. Segundo sinalan a un nivel máis xenérico os organizadores, as asociacións de software libre Xeopesca e GPUL (Grupo de Programadores e Usuarios de Linux), con esta convocatoria preténdese achegar unha actividade de formación e de diversión, unha oportunidade “para pasármolo ben”, ao temo “que ampliamos o noso coñecemento sobre datos xeográficos con licenza libre”.
A actividade comenzará as 16:30 e rematará arredor das 20:30 horas, tendo o seguinte programa temático inicial: que é OpenStreetMap? Como se contribúe a el? Como podemos ser mapeadores de campo (OSMTrackers)?, Como podemos ser mapeadores de salón (iD, JOSM)? A continuación, a cita entrará na súa vertente máis práctica: os participantes serán divididos en equipos para levar a cabo o seu labor cartográfico-tecnolóxico, encetando (se o tempo o permite) andainas de campo e de recinto pechado.
Esta actividade forma parte das actividades que a asociación Xeopesca realiza no marco do convenio de colaboración asinado coa Axencia para a Modernización Tecnolóxica de Galicia (AMTEGA), e incluídas no Plan de Acción de Software Libre 2015 da Xunta de Galicia.
Sobre OpenStreetMap
OpenStreetMap, coñecido como “a Wikipedia dos mapas”, é un proxecto colaborativo que ten por obxectivo a creación dunha base de datos xeográfica a nivel mundial, dispoñible baixo unha licenza libre, o que permite dispoñer dunha cartografía de todo o planeta que se actualiza decote. Esta característica fai desta ferramenta un valioso recurso en labores de acción social, en proxectos de cooperación ao desenvolvemento ou na xestión de crises humanitarias.