O Día dos Solteiros confírmase como a meirande xornada mundial para o comercio electrónico

A proximidade da campaña de Nadal leva a moitas tendas en liña a anticipar as súas promocións, para animar a anticipar as compras, e mentres nos EE.UU. teñen fixado o día das ofertas no vindeiro 27 de novembro (Black Friday), en China levan anos elixindo o día 11 de novembro (11 do 11) para facer tal coa desculpa de considerar esta data o Día dos Solteiros, o que vívese especialmente na Internet, onde numerosas tendas en liña chinesas teñen atractivas ofertas durante poucas horas.
Confían en que durante a xornada de hoxe máis de 100 millóns de compradores en liña realicen algunha adquisición, o que fai que unha data que algúns entendían como a antítese ao San Valentín sexa unha festa máis do consumismo que no caso do xigante asiático Alibaba supón volumes de facturación impresionantes, de xeito que durante o ano pasado moven 9.340 millóns de dólares, triplicando as compras do comercio electrónico norteamericano durante o Cyber Monday, deixando claro o poderío do mercado chinés (aínda que cómpre destacar que actualmente é todo o mundo o que realiza adquisicións nas tendas en liña chinesas). De feito, este ano Alibaba xa superou as vendas do ano pasado en 12 horas (con 1.000 millóns de dólares facturados nos primeiros 8 minutos), e incluso coméntase que as tendas en liña chinesas superaron os 5.000 millóns de dólares durante os 90 primeiros minutos de hoxe.
Durante o ecuador da xornada, a segunda maior tenda en liña de China, JD.com, rexistrou 14 millóns de pedidos, polo que en vista deste volume de compras podemos asegurar que hoxe é realmente o día máis importante para as compras en liña a nivel mundial, pese a que o Black Friday teña máis nome e tradición.
ACTUALIZACIÓN: Confirman que ao remate da xornada Alibaba vendeu en liña produtos por valor de 14.341.847.366 dólares.