O Gaiás acolle o 26 unha nova xornada Getting Contacts

A Concellería de Economía e Comercio de Santiago e a iniciativa Getting Contacts organizan o vindeiro 26 de novembro un encontro de firmas galegas e estatais co obxectivo de favorecer colaboración e axudalas a atopar novos clientes, provedores, socios ou proxectos. Trátase da Xornada de Cooperación Empresarial Empresas Creativas e TIC (xornada Getting Contacts). No evento, amais de impulsarse a colaboración e o establecemento de novas ligazóns, poranse ao alcance dos participantes recursos innovadores para melloraren as súas redes comerciais e achar potenciais investidores. Na xornada, que é de balde e que se celebra na Cidade da Cultura de Santiago, colaboran o Centro de Emprendemento do Gaiás, a Fundación Cidade da Cultura de Galicia e o Clúster TIC.
A xuntanza dará comezo ás 9.30 horas. Lembrar que na anterior convocatoria participaron máis dun cento de empresas e arredor de 120 profesionais. Este ano, igual que nas edicións previas en Compostela (seis), a organización fará unha aposta especial no seu programa de actividades a prol das nosas empresas TIC e creativas.
A finalidade destes eventos é xerar unha contorna propicia para o intercambio de coñecemento e a cooperación entre empresas: un emprazamento que permita ás firmas tecnolóxico-dixitais, culturais e creativas traballar en rede e mellorar a súa competitividade a partir do intercambio de experiencias que faciliten e promovan a xeración de negocio.