A USC afondará este xoves nos mellores vieiros para crear as Cidades Intelixentes máis sustentables

Os vindeiros días vaise celebrar en Santiago, na Aula Magna da Facultade de Matemáticas, un encontro destinado a afondar nas posibilidades e utilidades reais das novas Tecnoloxías da Información e a Comunicación (TIC) no camiño de crear espazos urbanos mellor xestionados dende o punto de vista enerxético (máis sustentables, limpas, rendibles e eficaces). A cita, que se desenvolve este xoves 27, vén da man do Instituto de Investigacións Tecnolóxicas da USC en colaboración con Energylab e o Concello de Santiago. A asistencia a este encontro, o Foro Diálogo Local SmartCities e Enerxía, é de balde previa inscrición. Trátase dunha actividade ligada aos proxectos europeos LIFE-OPERE e PLEEC do programa FP7.
Segundo informa a USC, o programa deseñouse “para analizar as estratexias actuais da xestión enerxética das Cidades Intelixentes (Smart Cities), presentar diferentes proxectos europeos sobre uso eficiente da enerxía e analizar as tendencias futuras neste eidos”. Intervirán institucións e empresas do sector como FAIMEVI, CTAG, SETGA, CO2 Smart Tech, ITG ou ICOIIG, entre outras. O encontro diríxese á comunidade universitaria, investigadores/as e e empresarios/as, así como a persoal técnico do sector enerxético, persoal instalador de sistemas de enerxía e de mantemento e público en xeral interesado.