nVIDIA presenta un ordenador que servirá de cerebro para coches autónomos

O CES de Las Vegas está a dar comezo con sorpresas como a de nVIDIA, compañía especializada en tarxetas gráficas para equipos informáticos, que deu a coñecer o nVIDIA Drive PX 2, un ordenador de elevada potencia que estaría dirixido á súa integración en vehículos autónomos e que funcionará en combinación con DriveNet, unha plataforma de deep learning que facilitará o recoñecemento de obxectos dun xeito eficiente grazas a que os datos rexistrados compártense con outros vehículos a través da Internet.
O equipo que propón nVIDIA conta con 12 CPU e 4 GPU con refrixeración líquida, que sumarían unha potencial de 8 teraflops, aos que poderían sumarse 24 teraflops de operacións de procesamento profundo, o que sería como levar 150 portátiles MacBook pro no vehículo, deixando claro que a condución autónoma non é un xogo de nenos e supón un importante reto a superar.
O primeiro fabricante en integrar semellante solución de nVIDIA nun vehículo será Volvo, compañía que ten previsto ter 100 coches autónomos funcionando en probas pola cidade de Gothenburg.