Un importante fallo obriga a pausar a última grande actualización de Windows 10

A semana pasada, coincidindo coa presentación de novos produtos da familia Surface, comezou a distribución da actualización de outono de Windows 10, ou sexa a versión 1809, que incorpora numerosas melloras a nivel de produtividade, pero non tardaron en xurdir problemas puntuais coa actualización, dun nivel o suficientemente grave como para que Microsoft decidise conxelar a distribución da actualización para todos os usuarios mentres investigan as incidencias que xurdiron nos últimos días.
Distintos usuarios detectaron que, tras a instalación desta grande actualización, desapareceran todos os seus arquivos do cartafol de Documentos, no que semella un erro relacionado con OneDrive e as copias de seguridade na nube. Ao parecer, este fallo xa levaría varios meses experimentándose por parte de usuarios de proba de Windows, pero o volume de afectados sería moi reducido, polo que non terían elevado o erro para a súa corrección, e agora atopan un problema tan serio como para ter que cesar de distribuír a grande actualización semestral de Windows 10.