Correos fai chegar máis de 1.500 PDA aos seus repartidores en Galicia

Correos entregou 1.534 novos dispositivos portátiles de mobilidade (PDA) ao seu persoal de reparto en Galicia. Máis polo miúdo, entregáronse 670 na Coruña, 93 en Lugo, 229 en Ourense e 542 en Pontevedra.
Os novos trebellos inclúen unha mellora tecnolóxica pioneira que permite o cobro con cartón na propia PDA, que se empezará a utilizar en Lugo para logo estenderse a todas as provincias.
Concretamente, o novo equipo do fabricante Honeywell é un 35% máis rápido cós actuais e dispón dunha memoria interna de 6 GB fronte á actual de 1 GB, que “permitirá o desenvolvemento de mellores aplicacións”, informou Correos, poñendo o foco nas potencialidades da súa pantalla máis grande (5,5 polgadas), que dota aos dispositivos de meirande comodidade no uso, ao igual que o seu peso (só 260 gramos) e a súa feitura (son máis robutos e non precisan de funda).
As novas PDA axudarán nos procesos que se realizan nos centros de clasificación de paquetería e mellorarán os servizos que se realizan durante o reparto de envíos. “O seu uso”, explican dende a empresa, contribuirá a estender os servizos á contorna rural, “facilitando a vida dos cidadáns en calquera recuncho de Galicia” e poñendo en xogo funcionalidades para a veciñanza como a do pagamento dos servizos con cartón bancario desde o propio dispositivo portátil. De feito, lector NFC co que se dotou a estes novos terminais permite a lectura de calquera tarxeta contactless, smartphone ou, mesmo calquera reloxo intelixente. Como dixemos, a previsión é arrincar un piloto da prestación deste novo sistema de cobro con carteiros rurais da provincia de Lugo e, antes de que finalice o ano, estendelo aos máis de 6.000 empregados e empregadas que traballan no rural de todo o territorio nacional.