Premiado na UDC un proxecto de tecnoloxía inclusiva impulsado dende o CITIC

Un proxecto tecnolóxico con vontade de inclusión social dirixido por persoal investigador do Centro de Investigación TIC da Universidade da Coruña vén de ser galardoado na segunda edición dos Premios a Proxectos de Innovación Docente en Aprendizaxe-Servizo da UDC.
Trátase do proxecto TFG para o desenvolvemento de aplicacións informáticas de apoio á diversidade, dirixido polo subdirector do CITIC Javier Pereira Loureiro e os docentes da Facultade de Informática e persoal investigador do CITIC, Adriana Dapena Janeiro, Paula Castro Castro e Óscar Fresnedo Arias. En concreto, recibiron o segundo premio da modalidade Atención á Diversidade, dotado cunha contía de 400 euros.
O xurado dos premios, convocados polo Vicerreitorado de Internacionalización e Cooperación e o Vicerreitorado de Planificación Académica e Innovación Docente, fixo pública a listaxe definitiva de proxectos premiados o pasado 10 de setembro. En total, outorgáronse seis premios, dous por cada liña temática de participación: sustentabilidade, atención á diversidade e redución das desigualdades.
Amais da contribución dos investigadores de CITIC, resultaron recoñecidas as seguintes propostas:
-Economía con ciencia e conciencia: fomentando o desenvolvemento sostible, a cargo de Laura Varela Candamio (600 €).
-Taller de reciclaxe e consumo responsable. María José Abad López e Ana Isabel Ares Pernas (400 €).
-Práctica de curtametraxes de Ficción Audiovisual coa Asociación Down Coruña. Teresa Nozal Cantarero e Sandra Martínez Costa (600 €).
-Historias de vida, territorio e vulnerabilidade. Cartografía emocional do dereito ao hábitat na cidade da Coruña. De Laura Cruz López (600 €).
-Asesoría xurídica a familias, colectivos e persoas en risco de pobreza ou exclusión social. De Carmen Garcimartín Montero, Xosé Manuel Carril Vázquez e Rocío Quintáns Eiras (400 euros).