O COETG-AETG celebra en outubro o 25 aniversario da súa Noite Galega das Telecomunicacións

Este 22 de outubro celébrase en Santiago, no Hotel Oca Puerta del Camino, unha das grandes celebracións do calendario tecnolóxico anual da nosa terra: a Noite Galega das Telecomunicacións e da Sociedade da Información, organizada polo Colexio e a Asociación de Enxeñeiros de Telecomunicación de Galicia (COETG-AETG). Trátase dunha edición especial coa que se conmemora o 25 aniversario da gala. En palabras do COETG-AETG, “trátase do encontro do sector TIC por excelencia no que temos por obxecto poñer en valor a nosa profesión”.
Previamente á cea de gala da Noite, celebrarase o acto de entrega dos tradicionais Premios Galicia das Telecomunicacións e da Sociedade da Información 2021. O comezo das actividades está fixado para as 17.00 horas, cunha visita guiada á Catedral de Santiago (ao abeiro do programa de accións do Xacobeo 2021). Máis tarde, ás 19.00 horas, celebrase o cóctel de benvida e a xeira de networking entre as e os profesionais asistentes. O acto de entrega dos ditos premios está fixado para as 20.30 horas. A celebración da Noite (coa cega de gala) dará comezo ás 21.30 horas.