Wolters Kluwer e a Cámara da Coruña promoverán a dixitalización de pemes e autónomos

A división española da compañía de software Wolters Kluwer Tax & Accounting, referente en desenvolvemento de ferramentas de xestión, información e servizos para despachos profesionais e empresas, e a Cámara de Comercio da Coruña renovaron o seu acordo de colaboración co obxectivo de “axudar ao tecido empresarial coruñés, especialmente a autónomos e pemes, na súa transformación dixital”.
Wolters Kluwer colaborará coa Cámara orientando ás empresas interesadas na dixitalización a través de xornadas, eventos e contidos, dando a coñecer como as súas solucións e servizos poden contribuír a mellorar a súa competitividade.
Tomás Font, director xeral de Wolters Kluwer Tax & Accounting en España, sinalou: “Seguiremos traballando de forma conxunta coa Cámara de Comercio para apoiar a transformación das empresas da Coruña, achegando o noso liderado no sector e ofrecendo a nosa experiencia en solucións de xestión. Tras a crise xerada pola pandemia, atopámonos nun momento de incerteza no que resulta máis necesario que nunca estar á beira do tecido empresarial. Investimos en tecnoloxía que marca a diferenza, tecnoloxía para o mundo real. E imos trasladar este coñecemento aos autónomos e pemes coruñeses que o requiran”.
Pola súa banda, Antonio Couceiro, presidente da Cámara de Comercio da Coruña, destacou “a importancia de contar cun partner estratéxico como Wolters Kluwer, que ofrece a súa experiencia de xestión avanzada en contornas cambiantes co fin de axudar ás empresas a adaptarse a esta nova realidade”.