GAIN colabora con tres ducias de pemes e microempresas para fortalecer o seu pulo innovador

A Axencia Galega de Innovación (GAIN) vén de resolver a cuarta edición do programa InnovaPEME, que se dirixe a dar impulso ás capacidades e actividades innovadoras de 36 pemes e microempresas, a través dunha liña de axudas de 2,8 millóns de euros que, grazas á colaboración público-privada, permitirá mobilizar un investimento en I+D+i de 5,6M€. Segundo informou GAIN, o importe medio dos apoios (co-financiados polo Fondo Europeo de Desenvolvemento Rexional, FEDER, no marco do Programa Operativo FEDER Galicia 2014-2020), é de 77.700 euros, un 50% do custo subvencionable destes plans.
O obxectivo final é “promover a cultura da innovación, incrementar o número de empresas, aumentar a competitividade das firmas galegas, potenciar a colaboración das mesmas co resto de axentes do ecosistema innovador, favorecer a comercialización de resultados de I+D+i e ampliar a visión por parte dos xestores”, explicaron fontes da axencia autonómica, engadindo que nesta edición ficaron excluídas aquelas empresas que xa foron beneficiarias do programa en edicións anteriores, sendo a finalidade “achegar a innovación ao maior número de compañías posible para ampliar a base de firmas innovadoras galegas”. Neste punto, GAIN lembra que 21 das 36 empresas beneficiarias (un 58%) non tiveron antes axudas da axencia.
A axencia engade que “InnovaPeme 2021 contribuirá á creación e mantemento de emprego de calidade, xa que os plans apoiados contemplan a contratación de 45 novos técnicos, un 42% deles pertencentes a colectivos como mulleres e persoas discapacitadas, así como o mantemento de 149 postos de traballo”.