A Deputación de Pontevedra optimizará as prestacións do ePadrón posto a disposición dos concellos

A Deputación de Pontevedra vai dar un novo impulso á transformación tecnolóxica dos concellos. Segundo informou, ata 35 administracións locais da provincia que gozan arestora do servizo de padrón electrónico verán optimizadas as prestacións desta ferramenta co novo contrato que licitará a entidade provincial. Basicamente isto traducirase en servidores aínda máis rápidos e melloras na seguridade dos datos en cumprimento do Esquema Nacional de Seguridade.
Estas optimizacións materializaranse a partir do mes de febreiro, catro anos despois da posta en marcha do servizo de ePadrón, que, xunto coa plataforma de Administración Electrónica brindada tamén pola Deputación, acelerou a evolución dixital dos pequenos e medianos concellos da provincia. O procedemento de licitación xa está en marcha, sinalou a Deputación.
O novo padrón electrónico foi presentado este mes de novembro perante os concellos adheridos polo deputado Carlos Font, e a deputada, Ana Mejías, nunha xuntanza celebrada en formato telemático e na que participaron tódolos municipios cos seus técnicos/as responsables, ademais de 14 alcaldes/as e tenentes de alcalde/sa que mostraron o seu interese para a adhesión: A Illa de Arousa, Catoira, Fornelos, Marín, Meis, Pazos de Borbén, Redondela, Ribadumia, Salceda, Salvaterra, Soutomaior, Cuntis, Mos e O Rosal. Entre eles tamén estaba o Concello de Barro, que se atopa formalizando os trámites para adherirse.
Carlos Font expresou a súa satisfacción polos logros acadados nos catro anos transcorridos dende a posta en marcha deste novo xeito de tramitar o padrón de habitantes, prescindindo dos expedientes en papel e apostando decididamente polo formato electrónico. “Neste tempo”, dixo, “emitíronse un total de 261.559 certificados en sede electrónica, mentres que outros 273.104 foron emitidos en formato presencial utilizando a tecnoloxía brindada pola Deputación”. Ou sexa, engadiu, “que case o mesmo número de persoas obtiveron o seu certificado (documento habitual para numerosos trámites administrativos) sen necesidade de desprazarse”.
Amais, explicou que o sistema tramitou nestes catro anos 42.367 altas e 36.596 baixas nos padróns dos concellos, e que outras 39.150 persoas comunicaron modificacións dos seus datos persoais, cifras ás que se engaden 22.987 cambios de domicilio e 23.597 rectificacións de domicilio. Finalmente, deuse curso a 4.339 renovacións de estranxeiros/as.
Volvendo ao proxecto, sinalar que unha vez adxudicado o novo contrato á empresa tecnolóxica que resulte gañadora do procedemento, a Deputación soportará o 75% do custo, polo que os concellos que asinen o convenio deberán achegar o 25% restante.
Ata o de agora o padrón electrónico proporcionado pola Deputación está implantado nos concellos da Cañiza, A Estrada, Agolada, A Guarda, A Lama, As Neves, Arbo, Baiona, Bueu, Campo Lameiro, Cangas, Covelo, Crecente, Cuntis, Forcarei, Gondomar, Lalín, Mondariz, Mondariz-Balneario, Meaño, Moaña, Moraña, Oia, O Grove, O Rosal, Ponte Caldelas, Ponteareas, Portas, Sanxenxo, Silleda, Tomiño, Tui, Vila de Cruces, Valga e Vilaboa.