A serie interactiva Amnesia 3.0 centrou un coloquio co alumnado do IES San Xillao de Lugo

Alumnado do Bacharelato de Artes do IES San Xillao de Lugo participou onte nunha sesión sobre ficción dixital, na que se proxectou a serie interactiva Amnesia 3.0, a primeira en galego no seu xénero, escrita e dirixida pola lucense Irene Pin. A autora ompartiu cos estudantes a súa experiencia no proceso creativo e na produción da serie, finalista do Premio Mestre Mateo á Mellor Serie Web.
A Vicepresidencia da Deputación de Lugo promoveu a actividade que se repetirá este venres 17 na Escola Superior de Arte e Deseño Ramón Falcón de Lugo e no IES Monte Castelo de Burela, co obxectivo de achegar contidos audiovisuais en galego á mocidade e visualizar a obra de novas creadoras.
Amnesia 3.0 é a primeira webserie interactiva en galego e está escrita e dirixida por Irene Pin. Amais do dito premio, proclamouse gañadora do Premio a Mellor Piloto de Serie Nacional no Festival de Cine Español Emerxente (FECICAM). O argumento céntrase en recrear o que acontecería nun mundo que perdeu a capacidade de lembrar. A serie aposta por un novo tipo de relación interactiva cos espectadores: unha relación na que terán que escoller (os espectadores) o rumbo que toma a historia. Amnesia 3.0 é ademais un proxecto en desenvolvemento, ao xeito dun videoxogo ou dunha aplicación móbil.