Os cursos TIC nos centros sociais de Ames chegaron a 90 persoas e ofreceron 25 horas de formación

Os cursos de alfabetización dixital organizados nas parroquias pola Concellaría de Cultura de Ames chegan nestes días de decembro ao seu remate. As actividades, que formaron a 90 persoas nos diferentes aspectos da cuestión TIC (Tecnoloxías da Información e a Comunicación), desenvolvéronse nos centros sociais de Agrón, A Ameixenda, Augapesada, Biduído, Bugallido, Covas, Ortoño, Tapia e Trasmonte. Foron 25 horas de capacitación dende setembro ata decembro.
Como dixemos, 90 persoas completaron as prazas ofertadas e recibiron nocións básicas de uso das TIC, tocando materias como a ofimática, a navegación en liña, as redes sociais ou a seguridade en Internet. A concelleira de Cultura, Natividade Gónzalez, asistiu nas últimas dúas semanas ás clausuras dos cursos, repartindo diplomas e recibindo as valoracións da veciñanza participante, á que lle mostrou o seu “compromiso” para repetir a actividade.
O programa de alfabetización dixital respondeu a unha das demandas da veciñanza dos Orzamentos Participativos do ano 2020. Os obradoiros impartíronse durante tres meses, con dúas horas á semana nos ditos locais sociais. O obxectivo principal do curso, organizado pola Concellaría de Cultura, foi familiarizar ás veciñas e veciños do rural co emprego das TIC, facilitando xeitos seguros e axeitados para incorporar o mundo dixital a distintos aspectos das súas vidas cotiás.
A concelleira de Cultura, Natividade González, visitou as clausuras dos cursos nas súas nove sedes, repartindo diplomas de formación e coñecendo a opinión das 90 persoas que participaron no programa de alfabetización. Os obradoiros botaron o peche ao longo das dúas primeiras semanas de decembro, sendo os primeiros en rematar os de Augapesada e Covas, e os últimos os de Bugallido e Biduído. A estes dous locais acompañaron á concelleira o alcalde de Ames, Blas García, e o concelleiro do Rural e Participación Cidadá, Santiago Márquez.