Educación anuncia un novo pulo ao desenvolvemento tecnolóxico no ensino

O conselleiro de Cultura, Educación e Universidade, Román Rodríguez, compareceu hoxe no Parlamento de Galicia para expoñer as liñas de innovación e transformación dixital que experimentará o modelo educativo na nosa comunidade. Tamén indicou que o seu departamento está a ultimar a orde para crear máis de 200 Polos Creativos nos centros educativos de Galicia.
O titular do departamento educativo da Xunta, sinalou que esta acción se atopa na Estratexia de Educación Dixital 2030 e que o perfeccionamento das competencias e capacidades dixitais son necesarias para acadar unha verdadeira transformación dixital na educación. Esta estratexia contempla, entre outras iniciativas, a creación dun centro especializado no ensino dixital e na innovación, a formación do profesorado en competencias dixitais, deseño de estratexias docentes, ou a introdución de novas técnicas pedagóxicas. Esta contará con 120 millóns de euros nos tres primeiros anos para acadar os devanditos obxectivos. Hoxe mesmo tamén se publica a nova convocatoria de E-Dixgal, que contará con novos contidos editoriais e cun total de 75 centros que se poderán sumar á iniciativa. Este programa permitirá a máis de 50.000 alumnos de ensino básico, estudar con este sistema de libro dixial durante seis meses de curso consecutivos. O goberno galego tamén está a traballar no Plan EDU100, dotado con 134,6 millóns de euros e na nova estratexia de Formación Profesional, á que se destinarán 12 millóns.
Román Rodríguez explicou que a Estratexia Galega de Linguas Estranxeiras, EDUlingüe 2030, permitiu que a día de hoxe sexan máis de 100.000 alumos en 863 centros os que contan cun ensino plurilingüe. “As bibliotecas escolares veñen actuando como aceleradores da innovación educativa e son unha referencia para outras CCAA”, apuntou o conselleiro. A Consellería está a traballar tamén nunha liña estratéxica específica dirixida a paliar o acoso e ciberacoso, previr as condutas contrarias á convivencia e coidar do benestar emocional dos cativos e cativas.
Como remate, o titular da Consellería de Educación explicou que debido ao grande interese que suscitan as ensinanzas de FP en Galicia, a nova Estratexia FP Galicia 2030, será dotada con 900 millóns de euros ata 2024. No ámbito estatal, o concelleiro salientou que Galicia se atopa “cos deberes feitos” e reivindica unha ABAU máis equitativa ou un procedemento para que os estudantes universitarios poidan convalidar competencias na FP.