GAME prepara despedimentos masivos en Reino Unido

Do mesmo xeito que a cadea de tenda GameStop está a reducir considerablemente o seu cadro de persoal nos EE.UU., a británica GAME está a facer o mesmo no seu país de orixe, adiantando o medio Eurogamer que boa parte dos traballadores da compañía están a someterse a contratos de cero horas (modalidade laboral máis propia de franquías de comida rápida).
Aseguran que a meirande parte dos postos sen responsabilidades de dirección pasarían a contratacións sen mínimo de horas, o que supón unha grande precariedade para os traballadores, e reflicte a desconfianza da compañía a manter o seu volume de actividade.
Estas medidas irían acompañadas tamén por despedimentos, descoñecéndose polo momento cantos traballadores perderán o seu emprego en GAME nunha reestruturación do negocio que confirma o avance cara á total dixitalización do sector.
No Reino Unido GAME xa abandonou o negocio dos xogos usados, que é un dos poucos incentivos para acudir a tendas físicas, pois no territorio británico xa é máis habitual a compra de videoxogos en formato dixital, así como tamén é habitual a compra-venda de xogos usados a través de plataformas en liña.
No caso de España a situación é moi diferente, e o negocio dos xogos usados aínda ten moita forza, polo que a cadea de tendas GAME podería ter unha maior resistencia no tempo, aínda que pareza inevitable a decadencia das tendas físicas de videoxogos, que poderían converterse nunha rareza semellante ao que actualmente son, por exemplo, as tendas de discos.