Galicia acada un dos seis novos vales de innovación da UE

Galicia vén de acadar un dos seis novos vales de innovación concedidos pola Comisión Europea en todo o continente. Así o puxo de manifesto o conselleiro de Educación e Ciencia, Román Rodríguez, tras unha reunión de traballo cos socios europeos deste novo proxecto cun investimento de 14,3 millóns de euros.
O encontro, no que tamén participou a directora da Axencia Galega de Innovación (GAIN), Carmen Cotelo, serviu para emprender a colaboración entre os 19 socios dos nove países europeos que participan neste proxecto baixo a coordinación da Xunta de Galicia.
Os 19 socios que integran o consorcio do val de innovación cuántica inclúen axencias rexionais, centros de investigación, universidades, clústeres industriais e empresas tecnolóxicas. En concreto, conforman o grupo a Xunta de Galicia (entidade líder), a través da Axencia Galega de Innovación, e o Centro de Supercomputación de Galicia (CESGA), en representación de España; por Italia, a Regione Emilia-Romagna, o Clust-ER Innovazione nei Servizi, Politecnico di Milano e Orthokey Italia; por Portugal, a Comissão de Coordenação e Desenvolvimento Regional do Norte (CCDR-N) e o International Iberian Nanotechnology Laboratory (INL); por Finlandia, o TU Delft; dos Países Baixos, a Business Tampere e a Tampere University; de Francia, a Région Île-de-France, o CEA (Commissariat à l’énergie atomique), Teratec e Systematic Paris Region; polo Reino Unido, o Welsh Government; por Romanía, a Regional Development Agency West Romania (ADR) e a Euro Atlantic Diplomacy Society, e de Austria, o DCS Computing.
Os vales de innovación cuántica funcionan como espazos de colaboración nos que administracións públicas, centros de investigación e empresas, entre outros axentes, traballan para compartir coñecemento e infraestruturas, desenvolver cadeas de valor, impulsar talento e capacidades tecnolóxicas e crear diversas solucións innovadoras.
Así pois, o obxectivo é que o val rexional de innovación liderado por Galicia “contribúa á soberanía tecnolóxica de Europa, fortalecendo a posición comunitaria nun ámbito clave para o futuro”, informou o conselleiro, engadindo que “se busca acelerar a transferencia de coñecemento ao mercado e á sociedade, impulsar o crecemento de empresas de base científico-tecnolóxica e mellorar a formación do capital humano, facilitando que haxa profesionais cualificados”.
A Xunta de Galicia decidiu optar a esta convocatoria, denominada Ecosistemas Europeos de Innovación, “consciente” das fortalezas nun eido emerxente no que a nosa Comunidade se está situando con forza no panorama internacional. “O resultado é esta resolución favorable malia que ata agora só existían cinco vales de innovación en toda a UE”, engadiu Rodríguez.
O proxecto, coordinado desde a Consellería de Educación, Ciencia, Universidades e FP, leva por nome EQUIVALEMT (European Quantum Innovation Valleys as Strategic Emerging Technology), terá unha duración de algo máis de catro anos, en concreto de 50 meses. A Comisión Europa achegará o 50% do financiamento necesario, mentres que as rexións implicadas completarán a outra metade. En total, o val de innovación cuántico estará formado por 19 socios de nove países: España (representado en exclusiva por Galicia), Italia, Portugal, Países Baixos, Finlandia, Francia, Reino Unido, Francia e Romanía.
O orzamento, que suporá un investimento de case 3 millóns de euros en Galicia, permitirá apoiar proxectos de startups, pemes e centros de coñecemento a través de convocatorias competitivas abertas para desenvolver aplicacións de tecnolóxicas cuánticas. En concreto, está previsto o lanzamento de tres liñas de axudas que permitirán probar tecnoloxías en contornas reais e acelerar deste xeito a súa adopción na industria.
Ademais destas liñas de axudas, prevense “actuacións encamiñadas a desenvolver o ecosistema cuántico europeo a través de tarefas de avaliación e análises, a cooperación entre rexións, formación e desenvolvemento de talento, apoio a novas firmas innovadoras e cadeas de valor tecnolóxicas e a elaboración de recomendacións de política pública”.