Unha enxeñeira de ITG desenvolverá no MIT solucións de robótica avanzada

Anabel Díaz Labrador, investigadora do centro tecnolóxico ITG (Instituto Tecnolóxico de Galicia) e doutoranda industrial, realizará unha estadía de investigación no Massachusetts Institute of Technology (MIT) entre o 1 de agosto e o 31 de outubro deste ano.
Esta experiencia internacional contribuirá a impulsar o desenvolvemento de novas solucións no ámbito da robótica, informou o ITG, engadindo que a devandita é unha das súas liñas estratéxicas: un ámbito no que o centro desenvolve solucións que combinan intelixencia artificial (IA), visión artificial, robótica avanzada e tecnoloxías inmersivas para crear sistemas autónomos capaces de interactuar coas persoas e operar en contornas complexas.
Entre os seus desenvolvementos destacan plataformas de teleoperación inmersiva de robots, sistemas de navegación intelixente e novas capacidades para robots móbiles e cuadrúpedos, con aplicacións en sectores como a industria, a xestión de infraestruturas críticas ou as emerxencias.
A estadía permitirá á investigadora ampliar coñecementos, establecer sinerxías con grupos de referencia internacional e complementar o traballo que está a desenvolver no marco do seu doutoramento industrial, fortalecendo a transferencia de coñecemento ao sector.
Esta iniciativa contou, ademais, co apoio do Centro de Investigación en Tecnoloxías da Información e as Comunicacións (CITIC) da Universidade da Coruña (UDC), onde Anabel Díaz Labrador realiza a súa tese doutoral baixo a dirección de José Luis Calvo Rolle, do grupo de Ciencia e Técnica Cibernética (CTC). En particular, a área Internacional do CITIC foi a responsable de impulsar esta colaboración, grazas á relación previa existente co MIT, que favorece o intercambio de talento e coñecemento entre ambas as institucións.
Para ITG, esta experiencia supón “unha oportunidade para seguir reforzando a capacidade investigadora” e avanzar “no desenvolvemento de solucións de robótica, incorporando novas perspectivas e metodoloxías procedentes dun dos ecosistemas científicos e tecnolóxicos máis recoñecidos do mundo”.
Neste contexto, a investigación de Anabel Díaz Labrador intégrase nunha liña de traballo que ITG desenvolve desde hai anos para dotar aos robots dunha maior autonomía e intelixencia. A súa tese céntrase na coordinación de frotas de robots cuadrúpedos e aborda tecnoloxías como a visión artificial, a comprensión de instrucións en linguaxe natural mediante IA e, actualmente, o desenvolvemento de técnicas de xeración de mapas intelixentes que permiten aos robots interpretar a contorna e tomar decisións de forma máis eficiente. Os avances obtidos no MIT contribuirán a reforzar estas capacidades e acelerar a súa transferencia a aplicacións reais.
A estadía da investigadora contribuirá, ademais, a fortalecer os vínculos internacionais entre ITG, a UDC, o CITIC e o MIT, promovendo a cooperación científica e a xeración de coñecemento en áreas tecnolóxicas clave para o futuro.
Anabel Díaz Labrador (Tenerife, 2000) é enxeñeira informática pola Universidade de La Laguna e fixo un mestrado en Informática Industrial e Robótica, impartido conxuntamente pola Universidade de La Laguna e a Universidade da Coruña. Actualmente desenvolve a súa tese doutoral no ámbito da robótica autónoma e ten un contrato predoutoral en ITG.