Google presenta tres novos modelos de Gemini orientados á eficiencia e á velocidade

Google presentou unha nova xeración de modelos Gemini deseñados para reforzar o desenvolvemento de axentes de intelixencia artificial en produción, cun foco explícito na eficiencia de tokens, na redución de latencia e na fiabilidade. A compañía de Mountain View introduce Gemini 3.6 Flash, 3.5 Flash‑Lite e 3.5 Flash Cyber, tres propostas que buscan cubrir diferentes necesidades de desenvolvedores e empresas que operan con cargas de traballo complexas e de alto volume.
O modelo máis destacado é Gemini 3.6 Flash, concibido como un workhorse capaz de mellorar o rendemento en tarefas de programación, análise documental e traballo de coñecemento. Segundo Google, reduce o consumo de tokens nun 17% respecto de 3.5 Flash e ofrece melloras en precisión, execución de código e tarefas multimodais. Tamén incorpora un prezo máis baixo por millón de tokens, co obxectivo de abaratar o custo por tarefa en contornos de axentes . A compañía destaca avances en benchmarks como DeepSWE e MLE Bench, así como unha maior capacidade de uso de ferramentas e interacción con contornos de escritorio a través da API de Gemini.
Xunto a el chega Gemini 3.5 Flash‑Lite, orientado a escenarios de baixa latencia e alto throughput. Google afirma que é o modelo máis rápido da serie 3.5, capaz de xerar ata 350 tokens por segundo e cun custo sensiblemente inferior ao de modelos anteriores. A empresa sitúao como unha opción idónea para sistemas axénticos, buscas masivas e procesamento documental, con melloras notables en tarefas de contexto longo, execución real e avaliacións de programación.
O terceiro modelo, 3.5 Flash Cyber, está especializado en ciberseguridade e intégrase no sistema CodeMender. Está deseñado para detectar, validar e parchear vulnerabilidades de forma máis eficiente, alcanzando resultados competitivos en benchmarks como CyberGym . Debido ao seu potencial de uso dual, Google limitará inicialmente o acceso a gobernos e socios de confianza nun programa piloto restrinxido.
Tamén confirman que Gemini 3.5 Pro continúa en fase de probas con socios e que xa iniciou o adestramento de Gemini 4, descrito como o seu ciclo de pre‑training máis ambicioso ata a data.
Os novos modelos están dispoñibles desde hoxe a través da API de Gemini, Google AI Studio, Android Studio e a plataforma empresarial Gemini Enterprise, mentres Flash‑Lite comeza a integrarse tamén en Google Search. Google anima a desenvolvedores e empresas a probar estas versións e enviar feedback para orientar a evolución da familia Gemini.