Altia adquire Ednon para reforzar a súa oferta tecnolóxica

Altia formalizou a adquisición do 100 % de Ednon, unha operación valorada en 9,85 millóns de euros, á que poderá sumarse un pagamento variable (earn out) de ata 2,795 millóns de euros condicionado ao cumprimento do plan de negocio da empresa durante os exercicios 2026 e 2027. A integración permitirá incorporar ao grupo os 140 profesionais de Ednon e ampliar as súas capacidades en ámbitos como a innovación, o goberno do dato, a ciberseguridade, as infraestruturas tecnolóxicas, os servizos xestionados e a integración de sistemas e comunicacións.
Fundada en 2004, Ednon acumula 22 anos de traxectoria e conta cunha presenza consolidada no mercado español, tanto no sector público como no privado. A súa actividade ten un peso destacado en áreas como a sanidade (con proxectos relacionados coa medicina dixital e a xenómica), o comercio polo miúdo, a xustiza e a banca.
A operación encaixa na estratexia de crecemento inorgánico de Altia, baseada na integración de compañías con capacidades complementarias e equipos altamente especializados. A adquisición tamén reforza a presenza do grupo en proxectos que requiren infraestruturas críticas, servizos de continuidade de negocio, ciberseguridade, gobernanza do dato e desenvolvemento de solucións de software adaptadas ás necesidades dos clientes.
Ednon achega tamén a súa aposta pola innovación a través de Ednon Labs, a súa factoría de innovación, desde a que desenvolve servizos e solucións orientados á transformación dixital combinando coñecemento técnico e especialización sectorial.
O presidente de Altia, Constantino Fernández, sinala que «a incorporación de Ednon reforza de forma moi clara a nosa capacidade para seguir ampliando o portfolio de servizos e complementar capacidades en ámbitos de alta demanda tecnolóxica». Engade que se trata dunha empresa «cunha traxectoria sólida, un equipo moi cualificado e unha cultura empresarial moi próxima á nosa», polo que considera que a operación abrirá novas oportunidades tanto para os clientes como para os profesionais que se incorporan ao grupo.
Pola súa parte, o socio de Ednon, Francisco Bao, afirma que «a integración en Altia permite dar continuidade ao traballo desenvolvido durante os últimos 22 anos e abrir unha nova etapa para o equipo e para os clientes de Ednon». Ao seu xuízo, a unión facilitará abordar proxectos de maior dimensión, sumar capacidades e seguir ofrecendo servizos especializados adaptados ás necesidades das organizacións inmersas en procesos de transformación dixital.
Ednon pechou o exercicio 2025 cunha facturación de 18,2 millóns de euros e un EBITDA de 1,8 millóns de euros. Segundo a empresa, os contratos xa asinados durante este ano permiten garantir o cumprimento dos obxectivos previstos para o exercicio 2026, reforzando a continuidade dun proxecto baseado na especialización tecnolóxica e na proximidade aos clientes.