O Ministerio de Ciencia, Innovación e Universidades (MICIU) e o Grupo Social ONCE puxeron en marcha a campaña Unha vista única. Cóidaa para repartir de forma gratuíta dous millóns de lentes seguras para ver a eclipse total de sol do próximo 12 de agosto. En concreto, o Grupo Social ONCE distribuirá 1.700.000 exemplares e o MICIU, a través da Fundación Española de Ciencia e Tecnoloxía (FECYT), as 300.000 lentes restantes.
A distribución destas lentes seguras ten o obxectivo de previr os riscos oculares asociados á observación do Trío de Eclipses e forma parte do convenio que asinaron este 27 de xullo o secretario de Estado de Ciencia, Innovación e Universidades, Juan Cruz Cigudosa, e o vicepresidente primeiro de Coordinación Institucional, Solidariedade e Relacións Externas do Consello Xeral da ONCE, Alberto Durán, no Museo Nacional de Ciencia e Tecnoloxía de España (MUNCYT) da Coruña. No acto tamén participou a directora da Fundación Española para a Ciencia e a Tecnoloxía (FECYT), Izaskun Lacunza.
O MICIU comprométese, a través da Secretaría de Estado de Ciencia, Innovación e Universidades, a incorporar ao Grupo Social ONCE ás reunións da Comisión Interministerial para a preparación, organización e coordinación de actuacións relacionadas co Trío de Eclipses, así como a proporcionar recursos e materiais divulgativos que poidan ser adaptados, para garantir a inclusión e o desenvolvemento cultural de persoas con discapacidade visual en particular e con outras discapacidades.
A FECYT, ademais de distribuír 300.000 lentes seguras entre centros de investigación, museos de ciencia e outras entidades públicas do ámbito da ciencia, a innovación e as universidades, realizará campañas e actuacións de divulgación científica da eclipse para todos os públicos, en colaboración cos museos e centros de ciencia de España; e a elaborar e difundir materiais didácticos accesibles que permitan á cidadanía comprender o fenómeno de forma segura, a través da páxina web Trío de Eclipses.
Trátase do portal dixital oficial do Goberno creado para informar sobre os tres eclipses solares históricos que serán visibles na península ibérica entre os anos 2026 e 2028. É unha plataforma coordinada pola Comisión Interministerial para o Trío de Eclipses que serve como guía de referencia e divulgación científica.
Pola súa banda, o Grupo Social ONCE achegará os 2.000.000 de lentes certificadas para a observación do Trío de Eclipses e adaptará recursos e materiais divulgativos, para garantir a inclusión e o desenvolvemento cultural de persoas con discapacidade visual en particular e con outras discapacidades. A distribución realizarase especialmente -a partir do 3 de agosto- por parte dos vendedores e vendedoras da Organización presentes en todo o territorio.
Ademais, participará na creación e difusión de guías e directrices de observación segura, que garantan a saúde ocular durante o visionado das eclipses e a realizar campañas publicitarias alertando sobre os riscos dunha observación da eclipse sen contar cos elementos de protección visual requiridos.
O Grupo Social ONCE tamén emitirá tres cupóns para os días 12 de agosto de 2026, 2 de agosto de 2027 e 26 de xaneiro de 2028, coincidindo cos días durante os cales terán lugar as eclipses do chamado Trío de Eclipses. En total difundiranse cinco millóns de cupóns por cada sorteo durante os próximos tres anos.
Segundo lembra a FECYT, España será un dos mellores escenarios para gozar, con todas as medidas de seguridade, da eclipse solar total que, o mércores 12 de agosto, cruzará o norte do país (desde Galicia ata Baleares) á tardiña. Será un evento histórico
A franxa de totalidade atravesará as comunidades de Galicia, Asturias, Castela e León, Comunidade de Madrid, Castela-A Mancha, Cantabria, A Rioxa, Euskadi, Navarra, Aragón, Cataluña, a Comunidade Valenciana e Baleares.
Por Galicia participan na campaña o Museo Nacional de Ciencia e Tecnoloxía (MUNCYT) da Coruña e os Museos Científicos Coruñeses.
