Google anunciou a integración das capacidades de xeración de imaxes de Nano Banana 2 en Google Earth, unha novidade que permite crear representacións personalizadas a partir das imaxes por satélite, aéreas e en 3D da plataforma. A función está dispoñible desde hoxe para os usuarios da versión web de Google Earth en todo o mundo.
A ferramenta permite seleccionar calquera punto do mapa, premer na opción Crear imaxe e describir mediante texto a escena que se quere visualizar. Nano Banana 2 utiliza a información xeográfica e visual de Google Earth como base para xerar imaxes coherentes co lugar real, abrindo novas posibilidades tanto educativas como profesionais e creativas.
Entre os usos destacados figura a recreación histórica de espazos. Por exemplo, é posible transformar as ruínas actuais de Pompeia nunha representación fotorrealista do seu aspecto no ano 78 da nosa era, o que facilita a comprensión visual de acontecementos históricos en contornos educativos.
A integración tamén permite xerar infografías sobre monumentos e lugares de interese. Cunha simple descrición, Gemini recompila información histórica relevante mentres Nano Banana crea unha composición gráfica que resume os principais datos do emprazamento.
Outro dos escenarios previstos é o urbanismo e o sector inmobiliario. Arquitectos e planificadores poden visualizar como quedaría un soar baleiro convertido nun distrito comercial, un parque ou calquera outro desenvolvemento urbanístico, facilitando a presentación de proxectos a clientes antes do inicio das obras.
A ferramenta tamén serve para anticipar proxectos particulares, como a construción dunha vivenda. Basta con situarse sobre un terreo e solicitar, por exemplo, a incorporación dunha casa moderna construída con materiais sostibles para obter unha representación fotorrealista integrada na paisaxe existente.
As posibilidades esténdense tamén ao ámbito creativo. Os usuarios poden imaxinar transformacións completamente ficticias dun lugar, como converter o campus de Google en Mountain View nunha metrópole futurista con cúpulas de cristal, pasarelas luminosas e vehículos voadores.
ACTUALIZACIÓN (31-7-2026): Google retirou a nova función ao detectar usos abusivos da mesma:
