Telefónica activou un plan de supervisión e fortalecemento da súa rede móbil pola eclipse solar prevista para o mércores 12 de agosto e que será visible en varios puntos da xeografía española, entre eles Galicia.
A operadora, que comezou hai cinco meses coa planificación deste dispositivo para a eclipse, analizou a cobertura de rede nos máis de 400 puntos de observación notificados polas Comunidades Autónomas.
Para “responder á demanda extraordinaria de conectividade de observadores nacionais e internacionais que se prevé nos devanditos puntos”, Telefónica planificou executar labores de parametrización específica e optimización en 31 provincias e 2.756 emprazamentos repartidos ao longo dos miles de quilómetros que abranguerá en España a próxima eclipse solar, especialmente visible en Aragón, Asturias, Baleares, Cantabria, Castela-A Mancha, Castela e León, Cataluña, Comunidade de Madrid, Comunidade Valenciana, Galicia, A Rioxa, Navarra e País Vasco.
Estas actuacións implican que Telefónica reconfigura de “forma intelixente” os parámetros técnicos das estacións base, adaptándoos á demanda de tráfico. Deste xeito, engade a operadora, “a rede redistribúe a capacidade dos equipos e o largo de banda para garantir que os usuarios poidan dispoñer do servizo de forma estable e sen interrupcións”.
Este reforzo con motivo da eclipse solar enmárcase no plan verán de Telefónica que se concreta este ano en máis de 500 actuacións sobre a infraestrutura xa existente e novos despregamentos en 34 localidades clave da costa española, ademais de cubrir e parametrizar 440 eventos con accións de optimización e, adicionalmente, o desprazamento de varias unidades móbiles a diferentes puntos da xeografía española nos eventos máis multitudinarios.
