O proxecto SPARC e a planta de semicondutores fotónicos que a Zona Franca de Vigo está a construír no PTL (Parque Tecnolóxico e Loxístico) suman ata o de agora un total de 110 millóns de euros de investimento entre capital, subvencións e préstamos. A iniciativa, que dotará a Vigo da única fábrica de chips fotónicos de España e unha das tres de Europa, logrou unha nova axuda do Gobierno de España que ascende a 6,25 millóns de euros, enmarcada nos fondos europeos para Incentivos Rexionais.
Esta partida para a planta de SPARC en Vigo, único proxecto galego que recibe estes fondos, desbloqueará ademais outros 56,8 millóns de euros de financiamento e supoñerá manter os postos de traballo e a creación doutros 90 empregos.
Así o fixeron saber o delegado do Gobierno en Galicia, Pedro Blanco, o alcalde de Vigo Abel Caballero, o delegado do Estado na Zona Franca, David Regades, e a terceira tenenta de alcalde en Vigo, Elena Espinosa, durante unha visita ás oficinas de SPARC, onde foron recibidos por Francisco Soares, director tecnolóxico do proxecto.
Indicaron que con esta última subvención para Incentivos Rexionais, aprobada polo goberno central, os fondos ascenden a case 12 millóns de euros obtidos por SPARC. Case 5 millóns de euros proceden das distintas convocatorias do CDTI (Centro para o Desenvolvemento Tecnolóxico e a Innovación), adscrito ao Ministerio de Ciencia, Innovación e Universidades, que promove a innovación e o desenvolvemento tecnolóxico das empresas, financiando proxectos de I+D en cooperación liderados por empresas para axudar a dar resposta aos retos socioeconómicos. SPARC tamén conseguiu máis de 1 millón de euros da convocatoria de IPCEI (Proxectos Importantes de Interese Común Europeo), lanzada polo Ministerio de Industria para os proxectos e as cadeas de valor estratéxicas industriais para a UE.
Con todo iso, o investimento público directo no proxecto é xa de 31 millóns de euros, tanto en capital como en subvencións, coa achega directa do Gobierno de España a través da Sociedade Española para a Transformación Tecnolóxica (SETT) con 17,2 millóns de euros; case 12 millóns en subvencións e 3 millóns de euros de Vigo Activo, a sociedade de capital risco da Zona Franca. O resto, ata os 110 millóns de euros mobilizados ata o de agora complétanse co capital privado de 20 millóns de euros de Indra e ao redor doutro millón de euros do resto dos investidores.
O delegado do Estado na Zona Franca, David Regades, destacou que esta nova axuda supón un paso máis no compromiso firme do Goberno de España con Vigo e coa súa capacidade para liderar proxectos estratéxicos de alto valor engadido:“Estamos a investir no futuro, apoiando unha iniciativa que vai situar a Vigo e a Galicia no mapa europeo dos semicondutores fotónicos, un sector chamado a desempeñar un papel decisivo na transformación tecnolóxica e industrial das próximas décadas”.
Durante a visita, o grupo de enxeñeiras e enxeñeiros que conforman o núcleo tecnolóxico do proxecto explicaron o tipo de traballo que desenvolven e as súas motivacións para formar parte de SPARC. Pedro Blanco concluíu sinalando que a nova planta de SPARC é “un exemplo da nova Galicia industrial que estamos a construír” e engadiu que “Vigo sempre atopará no Goberno de España un aliado para seguir crecendo, innovando e liderando o futuro”.
O alcalde de Vigo, Abel Caballero agradeceu o liderado de Vigo e da Zona Franca no proceso de SPARC e recalcou que é un proxecto que marca un fito para a cidade inimaxinable hai dúas décadas.
En canto á fábrica, as obras de construción que xestiona a Zona Franca de Vigo seguen desenvolvéndose nos prazos previstos, manténdose a estimación de estar finalizada no próximo verán de 2027.
Chips fotónicos
Un chip fotónico é un microchip avanzado que utiliza partículas de luz (fotóns) en lugar de corrente eléctrica (electróns) para xerar, procesar e transmitir información. Moven datos mediante feixes de luz a través de diminutas guías de onda integradas nun substrato. Ademais, multiplican a velocidade de cálculo, apenas xeran calor e reducen drasticamente o gasto enerxético fronte á electrónica tradicional. Empréganse en telecomunicacións de alta capacidade, intelixencia artificial, sensores ópticos avanzados e sistemas de automoción.
O proxecto de Vigo sitúa á cidade na vangarda de España e Europa no deseño e produción desta tecnoloxía de chips de luz.
