SOGAMA, o Complexo Medioambiental de Cerceda (A Coruña), fixo balance das visitas recibidas nas súas instalacións durante o curso que vimos de deixar atrás (o curso 2025-2026), unha cifra que se situou en case 91.000 persoas (segundo o informe elaborado pola sociedade ambiental).
No informe dise que os visitantes proceden dos 304 municipios galegos que xestionan a día de hoxe os seus residuos a través desta empresa pública. A divulgación realizada a través de realidade virtual é unha das actividades mellor valoradas.
Os escolares mostran especial interese polas lentes de realidade virtual e os xogos interactivos incorporados ao programa.
O programa recibiu tamén a delegacións de Panamá, Turquía, Macedonia do Norte e Grecia.
A realidade virtual (RV) e os xogos interactivos forman parte do programa educativo de SOGAMA dende 2023 co obxectivo de amosar o funcionamento interno do Complexo Medioambiental de Cerceda. Estas tecnoloxías utilízanse principalmente para complementar as visitas de centros escolares e colectivos sociais sen necesidade de poñer en risco a seguridade dos participantes.
Inclúese unha visita virtual en 360º que permite aos visitantes dispor dunha visión máis detallada do proceso industrial que desenvolve SOGAMA e, ademais, dá a oportunidade de coñecer o interior do complexo medioambiental a través de lentes inmersivas de realidade virtual a aqueles colectivos que por limitacións de idade ou mobilidade non poden acceder fisicamente ás instalacións.
A maiores, SOGAMA tamén incorpora o xogo arcade Trash & Furious, que consiste nun recurso educativo co que os visitantes teñen a oportunidade de poñer a proba o aprendido durante a xornada formativa, pero dun xeito divertido e entretido.
Así, na sala de recepción de SOGAMA instaláronse 4 máquinas, que se identifican cos 4 principais contedores -amarelo, azul, marrón e xenérico- para que un total de 8 xogadores -2 por máquina- compitan clasificando diferentes tipoloxías de refugallos e transportándoos ata a planta de tratamento que corresponda.
Máis polo miúdo, a dinámica consiste en que mentres un dos xogadores selecciona os refugallos que circulan por unha cinta transportadora e os arrastra ao contedor correspondente, o compañeiro de equipo conduce un camión que os recolle por unha cidade e transporta ata o centro de xestión. Os xogadores van sumando puntos en base ao seu coñecemento e rapidez tendo en conta que poderán atoparse con imprevistos que deberán xestionar da mellor forma para evitar ser penalizados.
