O Ministerio de Defensa, a través do Mando de Operacións do Estado Maior da Defensa (EMAD), activou hoxe a despregadura das Forzas Armadas para a campaña de vixilancia e prevención de incendios forestais na comunidade galega. O dispositivo, froito do convenio subscribido coa Xunta de Galicia, manterase plenamente operativo de maneira ininterrompida ata o próximo 25 de setembro.
Un continxente composto por 35 patrullas terrestres e dous equipos de mantemento móbil centrará os seus esforzos nas zonas de maior risco.
As patrullas, integradas por militares da Brigada “Galicia” VII (BRILAT) do Exército de Terra e do Terzo Norte de Infantería de Marina da Armada (con sede en Ferrol), realizarán labores de supervisión diaria en 8 distritos forestais e 39 municipios da xeografía galega.
A principal innovación tecnolóxica do operativo pasa pola incorporación de sistemas aéreos non tripulados (drons). Estas aeronaves achegarán capacidade de recoñecemento aéreo en tempo real, tanto diúrno como nocturno, para a detección temperá de focos de calor e a perimetraxe de incendios.
Cada patrulla estará equipada con dispositivos GPS facilitados pola Administración autonómica para optimizar a eficacia dos desprazamentos.
Con estas ferramentas dixitais e ópticas de última xeración, o dispositivo optimiza a alerta temperá ante conatos de calor, o que permite unha resposta rápida para evitar que se transformen en grandes incendios.
Segundo explicou o Estado Maior da Defensa, este dispositivo de apoio ás autoridades civís forma parte do convenio de colaboración subscribido recentemente por ambas as institucións para “intensificar as tarefas de prevención, disuasión e detección de incendios forestais” durante o período de máximo risco do verán.
O convenio entre Defensa e a Xunta contempla que, se as condicións meteorolóxicas ou a evolución da campaña obrigan a reforzar o dispositivo ou prolongalo máis aló do 25 de setembro, ambas as administracións poidan facelo mediante unha modificación do acordo e o correspondente financiamento adicional.
