O Celta e Siweb renovaron o seu acordo de colaboración ata 2028, consolidando unha alianza que comezou en xaneiro de 2025 e que, segundo informaron as dúas entidades, “continúa medrando con novas vías de colaboración”.
Como principal novidade desta renovación, Siweb amplía o seu patrocinio ao Celta Fortuna durante a presente tempada, reforzando deste xeito a súa vinculación co proxecto de canteira do club e cun equipo que nesta tempada competirá en LaLiga Hypermotion.
A compañía viguesa, especializada en solucións dixitais para empresas, continuará ligada ao Celta durante as próximas campañas, dando un novo paso nunha relación que une dúas entidades con profundas raíces en Galicia e unha clara vocación de crecemento e innovación.
Durante a sinatura do acordo, estiveron presentes a presidenta do Celta, Marián Mouriño, e o director executivo (CEO) de Siweb, Raúl García.
No encontro, o Celta celebrou a continuidade de Siweb como un dos seus patrocinadores e valorou especialmente a ampliación do acordo ao Celta Fortuna.
Pola súa banda, Siweb reafirmou con esta renovación a súa vontade de seguir medrando da man dunha institución referente en Galicia e de “continuar compartindo co celtismo unha alianza baseada no arraigo, na innovación e na mirada cara ao futuro”.
Fundada en 2006, Siweb naceu co obxectivo de facer máis accesible a presenza dixital profesional para empresas e profesionais. A partir de aí, a compañía evolucionou ata desenvolver solucións dixitais orientadas a mellorar a eficiencia e os resultados das empresas, incorporando novas tecnoloxías e intelixencia artificial aos seus produtos e servizos.
