Microsoft está a unificar as aplicacións de Copilot para consumidores e empresas nunha única aplicación, un cambio que chegará acompañado da retirada de varias funcións menos utilizadas. Entre elas atópase Mico, a mascota animada que moitos consideraban sucesora de Clipo, que se incorporou a Copilot como acompañante virtual.
Os cambios están detallados en novos documentos de soporte de Microsoft e comezarán a chegar aos usuarios ao longo deste mes. A integración das versións para consumidores e para empresas busca crear unha experiencia máis uniforme arredor de Copilot, pero tamén implica a desaparición dalgunhas ferramentas.
Mico será retirado de Copilot como parte desta actualización. A mascota, representada como un personaxe animado con forma de mancha, non desaparecerá completamente dos servizos de Microsoft, xa que terá unha nova función en Learn Live, onde actuará como titor, pero todo apunta a que irá esmorecendo como aconteceu no seu día con Clipo.
Tamén desaparecerán Group Chat, Podcasts, Deep Research e as funcións experimentais de Copilot Labs. Group Chat permitía a varios usuarios colaborar nunha mesma conversa con Copilot, mentres que Podcasts servía para crear programas de audio xerados mediante intelixencia artificial a partir de intereses web e documentos.
Deep Research estaba orientado á elaboración de investigacións e informes detallados, funcionando como un asistente especializado para tarefas de procura de información. Pola súa banda, Copilot Labs daba acceso a funcións experimentais antes da súa posible incorporación ás versións estables do servizo.
Microsoft fixou o 18 de agosto como data para a retirada destas catro funcións. O contido xerado asociado a elas tamén será eliminado, polo que os usuarios que queiran conservar conversas de grupo ou podcasts deberán exportalos antes desa data.
