O Servizo de Inmigración e Control de Aduanas dos EE.UU. (ICE) prohibiu aos seus empregados utilizar as lentes de Meta nos espazos de traballo federais. O organismo considera que estes dispositivos poden funcionar como cámaras corporais e gravar ou transmitir información sensible sen autorización, preocupación cada vez máis estendida entre numerosos organismos, e que poderían ser un serio atranco para a popularización desta tecnoloxía.
A medida está recollida nun memorando difundido este martes e afecta a todo o persoal de ICE, non só aos axentes encargados das tarefas policiais. A prohibición aplícase ao uso das lentes dentro dos espazos de traballo federais.
David Venturella, director en funcións de ICE, explica no documento que as lentes poden «capturar, gravar ou transmitir involuntariamente información sensible, comprometendo potencialmente a privacidade e as garantías legais».
As lentes con IA de Meta incorporan unha pequena cámara situada na montura, xunto ao ollo, que permite gravar vídeo e audio. Un indicador luminoso branco pestanexa cando están realizando unha gravación. Tamén incorporan un asistente de intelixencia artificial que responde ás ordes de voz do usuario e, nalgunhas versións, unha pequena pantalla integrada na montura que permite consultar información.
A preocupación de ICE está relacionada precisamente coa capacidade destes dispositivos para realizar gravacións de maneira discreta. Ao contrario que unha cámara corporal convencional, as lentes poden pasar máis facilmente desapercibidas, polo que unha persoa podería ser gravada sen decatarse de que está diante dun dispositivo de gravación.
«As cámaras corporais de propiedade persoal e as gravacións non autorizadas están prohibidas, como sempre o estiveron», sinalou un portavoz do Departamento de Seguridade Nacional dos EE.UU.
A decisión de ICE súmase a outras prohibicións e restricións impostas a este tipo de dispositivos en diferentes organizacións e lugares de traballo debido ás preocupacións sobre privacidade, gravacións non autorizadas e posibles usos como ferramentas de vixilancia.
