O Portal de Contratos Públicos da Xunta publicou, por medio da Consellería de Sanidade, a licitación, por un importe de 2.762.439 euros, do servizo de atención aos usuarios dos sistemas e tecnoloxías da información dos hospitais do Servizo Galego de Saúde. O obxectivo é resolver de maneira continuada, rápida e eficiente as consultas, incidencias e avarías que poidan xurdir no labor habitual dos traballadores dos centros hospitalarios. As empresas interesadas neste procedemento teñen de prazo ata o 10 de setembro para presentar as súas ofertas.
As unidades de tecnoloxías da información dos distintos centros sanitarios teñen entre as súas funcións garantir a correcta atención aos usuarios das infraestruturas informáticas básicas e dos sistemas de información corporativos. Esta atención constitúe un dos piares de calquera plan de sostemento da actividade dixital, xa que permite manter a confianza dos usuarios ante as dúbidas e posibles erros que xurdan no seu traballo cotián cos sistemas.
A dixitalización da actividade asistencial en toda a rede hospitalaria do Servizo Galego de Saúde é xa unha realidade consolidada, polo que se debe garantir a calidade do servizo de atención ao elevado número de profesionais que utilizan actualmente os sistemas de información nos centros hospitalarios das distintas áreas sanitarias.
O período de vixencia inicial do contrato será de 12 meses. O prazo máximo de duración, incluídas as posibles prórrogas, será de 5 anos, polo que o seu valor estimado ascende ata os 11.871.641 euros.
Entre os servizos incluídos no contrato figuran a atención de consultas e solicitudes, as peticións de desenvolvemento de programas informáticos, a xestión de incidencias, os cambios nas aplicacións, as tarefas de instalación, configuración e xestión de elementos de hardware e software, as accións preventivas programadas e os labores relacionados coa implantación de novas aplicacións.
Novidades
Unha das principais novidades cuantitativas é o incremento do número máximo de usuarios que serán atendidos. A cifra pasa de valores comprendidos entre 4.500 e 7.000 usuarios por área sanitaria a entre 12.500 e 15.000. Tamén se amplía o catálogo de aplicacións obxecto de soporte, que pasa dun máximo de 150 a 200 sistemas.
Desde o punto de vista técnico, refórzanse os requisitos de seguridade coa exixencia expresa das certificacións ISO 9001 e ISO 27001, así como do Esquema Nacional de Seguridade.
Tamén se incorporan novos mecanismos de seguimento e control, con obrigas específicas de elaboración de informes, integración co sistema corporativo de xestión da calidade e novas penalizacións vinculadas ao incumprimento destes requisitos. O contrato contempla, ademais, un maior control organizativo e operativo da prestación.
