Instagram está a incorporar First Draft, unha nova función que automatiza a primeira edición dos Reels a partir de varios clips de vídeo. A ferramenta elimina pausas e recorta os fragmentos seleccionados para crear en poucos segundos unha primeira montaxe que o usuario pode modificar antes de publicala.
O funcionamento parte da selección de varios clips desde a cámara de Instagram ou desde a galería de Reels. Ao activar First Draft, a aplicación analiza as gravacións e reduce cada unha delas para eliminar os momentos de pausa e conservar os fragmentos máis relevantes. Instagram asegura que o proceso pode xerar unha primeira versión en menos de dez segundos.
A montaxe resultante non é definitiva. Todos os cambios realizados por First Draft poden reverterse, de maneira que o usuario pode axustar a duración dos clips, cambiar a súa orde ou realizar outras modificacións antes de continuar coa edición do Reel.
A ferramenta está dispoñible inicialmente na aplicación de Instagram para iPhone e está pensada para formatos como montaxes con varios clips, vídeos nos que aparece unha persoa falando ou gravacións do día a día. O obxectivo é reducir o traballo inicial de selección e recorte para que a edición poida centrarse antes nos aspectos creativos. Instagram confirmou que First Draft non utiliza IA para realizar esta edición automática.
