O Concello de Melide e a Asociación de Usuarios de Software Libre da Terra de Melide (MeLiSA) puxeron en marcha Sementeira Dixital, un programa destinado a facilitar equipos informáticos con software libre a alumnado en situación de vulnerabilidade ou con dificultades económicas para acceder a estes recursos.
O convenio foi asinado polo alcalde de Melide, José Manuel Pérez, e o tesoureiro de MeLiSA, Rafael Rodríguez Gayoso, coa presenza da concelleira de Política Social, Carmen Liñeira. A iniciativa pretende contribuír a reducir a fenda dixital, fomentar a autonomía no uso da tecnoloxía e promover o software libre como unha alternativa de acceso universal e equitativo aos recursos informáticos.
A selección dos beneficiarios corresponderá aos Servizos Sociais do Concello, a través dos departamentos de Traballo Social e Educación Familiar. Teranse en conta factores como a situación de vulnerabilidade socioeconómica, a residencia permanente no municipio e a ausencia dun ordenador no fogar ou a imposibilidade económica de adquirilo. Tamén se valorarán a motivación para aprender e utilizar estas ferramentas, o curso no que estean matriculados os menores e o número de nenos en idade de utilizar os equipos dentro de cada familia.
Non se establece un número máximo de beneficiarios, xa que dependerá do material que MeLiSA poida incorporar ao programa. Para iniciar a iniciativa, a asociación conta con cinco portátiles e cinco ordenadores de sobremesa.
MeLiSA, asociación de voluntariado creada en 2008 e con sede en Melide, recupera equipos informáticos procedentes de organismos e administracións públicas que renovan periodicamente o seu parque tecnolóxico. Os ordenadores son preparados para un novo uso e equipados con software libre.
O proxecto non se limita á entrega dos equipos. Os ordenadores incorporarán solucións como GNU/Linux e LibreOffice, co obxectivo de achegar aos beneficiarios alternativas ao software privativo e favorecer que coñezan distintas ferramentas e poidan escoller as que mellor se adapten ás súas necesidades.
O apoio de MeLiSA continuará despois da cesión. Segundo a dispoñibilidade dos voluntarios, a asociación ofrecerá orientación sobre o software instalado, titoriais e recursos de aprendizaxe, así como asistencia inicial para o manexo dos equipos. Tamén asumirá o soporte técnico, o mantemento e as reparacións de hardware que sexan necesarias.
O convenio terá unha duración inicial de cinco anos e non contempla achegas económicas directas entre as dúas entidades. O Concello será responsable da identificación dos destinatarios, a coordinación administrativa, o apoio institucional e a difusión do programa, mentres que MeLiSA achegará os equipos e asumirá o soporte técnico, o mantemento e a formación.
Os ordenadores seguirán sendo propiedade de MeLiSA durante o período de cesión. Cada beneficiario deberá asinar un contrato individual no que se establecerán as condicións de custodia e coidado do material.
O acordo inclúe finalmente a creación dunha Comisión de Seguimento formada por representantes do Concello e de MeLiSA, que se encargará de supervisar o desenvolvemento de Sementeira Dixital, resolver posibles incidencias e avaliar os resultados do programa.
