R, operador de comunicacións líder en Galicia, prepárase para a chegada da tecnoloxía 6G xunto a MasOrange, líder do mercado español das telecomunicacións por número de clientes. O grupo probou, xunto a Ericsson, a súa rede móbil na banda de 6 GHz, que está chamada a desempeñar un papel clave na despregadura do 6G, do mesmo xeito que a banda de 3,5 GHz foi fundamental para a 5G.
O fito forma parte da estratexia de innovación de MasOrange para anticiparse ás futuras necesidades de conectividade e preparar as súas infraestruturas para unha nova era marcada pola intelixencia artificial, a automatización, a computación cuántica, as experiencias dixitais inmersivas e outros casos de uso con capacidade para transformar distintos sectores da economía.
A chegada da 6G a España está proxectada arredor de 2030, pero MasOrange xa traballa na preparación desta nova xeración de redes mediante probas na banda de 6 GHz. Este espectro combina cobertura, capacidade e eficiencia, polo que se considera unha das bandas que terán maior relevancia no futuro. Aínda que as licenzas correspondentes non foron adxudicadas en España, o sector considera que será un recurso importante para que as redes móbiles poidan soportar novos servizos de última xeración mantendo a eficiencia enerxética.
Para que servirá a 6G
A 6G aspira a integrar de maneira nativa comunicacións, intelixencia, automatización e capacidades para percibir e interpretar o ambiente. As tecnoloxías ISAC (Integrated Sensing and Communication) constitúen un dos exemplos desta evolución, ao combinar comunicacións e sensorización mediante os mesmos sinais de radio.
As futuras redes poderán así non só transmitir información, senón tamén percibir o que sucede ao seu redor. A banda de 6 GHz será un dos elementos que facilitarán esta visión, ao ofrecer capacidade e cobertura suficientes para novos servizos baseados en intelixencia artificial, automatización, xemelgos dixitais e monitoraxe avanzada do mundo físico.
Entre as posibles aplicacións figuran a detección de persoas e vehículos sen recorrer a cámaras, o seguimento de activos en portos, fábricas ou aeroportos, o control remoto de movementos en ambientes industriais, a identificación de obstáculos para sistemas de mobilidade autónoma e a creación de xemelgos dixitais de cidades, estradas e infraestruturas en tempo real.
«A banda de 6 GHz multiplicará a capacidade das redes móbiles ante o crecemento inxente do tráfico de datos polo uso intensivo da IA e doutras experiencias dixitais avanzadas. Estamos perante un habilitador tecnolóxico fundamental para calquera operador que aspire a liderar o mercado na vindeira década», declarou Alfredo Ramos, director de R e territorial de MasOrange en Galicia.
Unha nova xeración de redes e antenas intelixentes
A incorporación de novas frecuencias ás comunicacións móbiles require unha nova xeración de equipos e tecnoloxías de radio. As probas realizadas por MasOrange e Ericsson incluíron arquitecturas avanzadas de antenas activas que evolucionan desde as configuracións actuais de 64 transmisores e receptores (64TR) ata sistemas 256TR, capaces de cuadriplicar o número de elementos radiantes.
Tamén se probaron técnicas avanzadas de beamforming, que permiten dirixir de forma dinámica e precisa o feixe de transmisión de datos cara á localización e ás necesidades específicas de cada usuario en movemento. Esta tecnoloxía mellora o aproveitamento do espectro dispoñible e permite incrementar a capacidade da rede, mantendo unha maior eficiencia enerxética.
A combinación destas tecnoloxías permitirá aproveitar mellor cada MHz de espectro, multiplicar por catro a capacidade dispoñible en cada nodo móbil, mellorar a experiencia de usuario en ambientes de alta demanda e avanzar cara a redes máis eficientes, programables, abertas e sostibles.
España, laboratorio europeo da conectividade do futuro
As probas reforzan a aposta de MasOrange e R polo desenvolvemento tecnolóxico en España, onde o grupo xa traballou na despregadura de solucións como 5G Advanced e VoNR (voz sobre 5G). A validación da banda de 6 GHz supón agora un novo paso na experimentación con tecnoloxías destinadas ás futuras redes móbiles.
O desenvolvemento do 6G permitirá avanzar no coñecemento técnico necesario para optimizar os servizos de conectividade e contribuír ao desenvolvemento de capacidades estratéxicas nacionais, co obxectivo de reforzar o papel de España na experimentación en telecomunicacións e a competitividade dixital de Europa fronte a outros mercados.
