Sony presenta os WH-1000XM4C, unha nova versión dos seus auriculares sen fíos con cancelación activa de ruído que toma como punto de partida os WH-1000XM4, un dos modelos máis recoñecidos da serie 1000X. A renovación céntrase na configuración sonora, cunha nova sintonización e un ecualizador de 10 bandas, ademais de incorporar novas opcións de cor e unha característica da que cada vez escoitaremos falar máis: batería substituíble polo usuario (en cumprimento coa lexislación europea).
Os WH-1000XM4C conservan a tecnoloxía de cancelación de ruído da serie 1000X, deseñada para reducir o impacto do son ambiental durante a reprodución. O sistema permite atenuar ruídos habituais durante os desprazamentos e as viaxes, como os xerados polo transporte, as multitudes ou o tráfico urbano.
A reprodución de audio recibe unha actualización respecto dos WH-1000XM4. Sony modificou a sintonización dos auriculares para adaptala ás tendencias musicais actuais e incorporou un ecualizador de 10 bandas, que permite axustar a resposta sonora en función das preferencias do usuario.
O deseño mantén a estrutura de diadema dos WH-1000XM4, cun formato lixeiro e encartable pensado para facilitar o transporte. Esta configuración permite empregalos tanto durante sesións prolongadas de escoita como en desprazamentos, viaxes ou xornadas de teletraballo.
Os WH-1000XM4C están dispoñibles en negro, prata e lavanda a un prezo de 280 euros, máis asumibles que o modelo actual da serie, os WH-1000XM6, cun prezo oficial de 377 euros.
