Seguen adiante, logo do descanso estival, as actividades de divulgación e dinamización da campaña de toponimia galega Toponimízate. Falámosche dos nomes da túa terra.
A iniciativa ten unha parada este venres 11 de setembro no Centro de Maiores Os Gozos, do Pereiro de Aguiar (Ourense), unha cita programada a partir das 19.30.
Esta é unha das sete charlas que restan da campaña 2026 e que se impartirán ata o mes de novembro. Na cita están convocadas todas as persoas interesadas na toponimia local e que queiran sumarse a este gran proxecto colectivo de conservación dos nomes do territorio a través da plataforma Galicia Nomeada.
O principal obxectivo desta charla de Toponimízate será conseguir que a veciñanza do Pereiro de Aguiar se implique na recollida dos microtopónimos das súas aldeas a través da aplicación Galicia Nomeada.
Na charla participará Vicente Feijoo Ares, o principal referente e coordinador técnico do proxecto Toponimízate. Filólogo galego e membro do Seminario de Onomástica da Real Academia Galega (RAG), Feijoo é o encargado de impartir este ciclo de charlas divulgativas que percorre os diferentes concellos de Galicia. Centrará boa parte da charla en explicar polo miúdo o funcionamento da aplicación Galicia Nomeada e as súas principais características: como solicitar unha conta de usuario; como introducir un topónimo; como anexar imaxes, arquivos de son ou documentos; como enviar suxestións sobre topónimos xa existentes no visor…
A intención é que as persoas asistentes teñan unha visión xeral de todo o que lles permite facer a ferramenta e que tamén poidan saír da charla preparándoa para utilizala desde o primeiro momento.
A campaña Toponimízate 2026 é unha iniciativa de charlas divulgativas impulsada pola Secretaría Xeral da Lingua e a Real Academia Galega.
Baixo o lema Falámosche dos nomes da túa terra, a xira deste ano percorre un total de 12 concellos galegos entre os meses de abril e outubro co obxectivo de fomentar a recolla colectiva de microtopónimos a través da plataforma Galicia Nomeada.
A seguinte cita (logo da do Pereiro de Aguiar) será o 25 de setembro no Bolo (Ourense), na antiga Casa Cuartel, ás 19.00 horas.
