Instagram comezou a activar unha nova función que permite incorporar directamente á grella principal do perfil as publicacións nas que aparece etiquetado un usuario. A novidade ofrece máis control sobre o aspecto do perfil sen necesidade de volver publicar o contido.
A pestana de publicacións etiquetadas seguirá dispoñible para consultar todo o contido no que aparece o usuario, pero agora será posible seleccionar publicacións concretas e facer que tamén se mostren na grella principal. Instagram apunta como posibles usos as fotografías de grupo, colaboracións con creadores ou recordos, aínda que a función pode empregarse con calquera publicación na que o usuario estea etiquetado.
Existen varias maneiras de engadir unha publicación á grella. A opción aparece directamente na notificación recibida por mensaxe directa cando outro usuario realiza a etiqueta, no menú dos tres puntos situado na parte superior dereita da publicación e tamén ao manter premida unha publicación desde a pestana de contido etiquetado.
Ao seleccionar Engadir á grella, Instagram advirte de que a visibilidade da publicación continuará dependendo da configuración de privacidade tanto da conta propia como da conta do usuario que publicou o contido. A incorporación á grella, polo tanto, non modifica quen pode acceder á publicación orixinal.
As publicacións etiquetadas que se engadan á grella aparecerán inicialmente en orde cronolóxica inversa, aínda que tamén será posible reorganizalas posteriormente. A función tamén é reversible: unha publicación pode retirarse da grella principal sen eliminar a publicación orixinal nin a etiqueta.
