Spotify ampliará este outono o seu Partner Program a máis de 35 novos mercados, entre eles España, Italia, Brasil, México, Colombia e outros países de Europa, América Latina e o Caribe. A expansión permitirá que máis creadores de podcasts poidan acceder a novas vías de monetización e chega acompañada de cambios na experiencia dos podcasts en vídeo para os subscritores Premium.
O Spotify Partner Program combina diferentes fontes de ingresos para os creadores que cumpren os requisitos. Entre elas figuran os ingresos procedentes de vídeos vistos por usuarios Premium e a publicidade no nivel gratuíto de Spotify e noutras plataformas de escoita de podcasts. O programa tamén permite xestionar e informar sobre patrocinios integrados nos propios programas, dos que os creadores conservan o 100 % dos ingresos.
A plataforma ampliou a comezos deste ano os criterios de acceso ao programa para incorporar máis creadores (actualmente é preciso ter 1.000 membros da audiencia de Spotify nos últimos 30 días, 2.000 horas de consumo en Spotify nos últimos 30 días e un mínimo de 3 episodios publicados). Desde entón, os pagamentos mensuais totais aos programas participantes aumentaron máis dun terzo, mentres que os podcasts con vídeo integrados no programa rexistraron un crecemento medio superior ao 45 % nas horas de consumo desde o seu lanzamento.
A expansión tamén terá efectos para os usuarios de pagamento. Os subscritores Premium dos novos mercados terán menos publicidade ao ver podcasts en vídeo, xa que os anuncios dinámicos serán eliminados dos programas participantes. Os patrocinios introducidos directamente polos creadores continuarán formando parte dos episodios.
A lista de novos mercados inclúe España, Italia, Brasil, México, Polonia, Colombia, Chile, Perú, Ecuador, Guatemala, Costa Rica, Uruguai, O Salvador, República Dominicana, Paraguai, Honduras, Panamá, Bolivia, Nicaragua, San Marino, Andorra, Malta, Xamaica, Trinidad e Tobago, Curaçao, Bahamas, Barbados, Güiana, Belice, Suriname, Santa Lucía, Antiga e Barbuda, Haití, Granada, San Vicente e as Granadinas, San Cristovo e Nevis e Dominica.
